1. Se tés decidido colocarte un piercing, debes elixir un fabricado con materiais hipoalérxicos coma ouro, prata, titanio, tamén de aceiro cirúrxico, ou plástico, que permiten a súa esterilización.

2. Para evitar infeccións e transmisión de enfermidades, acude a centros que respecten as normas de hixiene e prevención de riscos sanitarios no tocante ás condicións do local, utensilios e materiais de traballo, sobre todo no que fai referencia á esterilización do material e á utilización de ferramentas dun só uso. Comproba que o centro está autorizado para realizar esas actividades.

3. Todo o material destinado directamente a atravesa-la pel, as mucosas ou outros tecidos, debe estar sempre estéril e ser dun só uso. Os materiais que se utilicen na operación e que non sexan rexeitables deben ser esterilizados e gardados en bulsas ou recipientes estériles ata o seu novo uso.

4. Cando vaias colocar o piercing non debes sofrir ningún tipo de enfermidade ou infección. O feito de padecela, ben sexa un arrefriado ou unha dor de moas, implica que o teu sistema inmunolóxico está esmorecido.

5. Debes pedir que che coloquen o piercing sobre unha zona da pel que non teña rozaduras, queimaduras, grans, reaccións alérxicas, nin síntomas de enfermidades dermatolóxicas.

6. Antes de colocarte o piercing é conveniente ter posta a vacina antitetánica. Lembra algo importante: non poderás ser doador durante un ano despois de ter posto o piercing.

7. Lémbralle á persoa que che vai poñe-lo piercing que che debe limpar e desinfecta-la pel antes de comezar a furar.

8. Ten en conta que hai partes do corpo como a lingua, o embigo, as mamilas, os beizos, os xenitais, nas que é máis fácil que os piercings podan ser arrincados co rozamento ó quedaren engarrados na roupa. Lembra tamén que as zonas de mucosas (boca, nariz, lingua e xenitais) son máis sensibles a contraer infeccións.

9. Posteriormente á colocación do piercing, debes evita-la formación de carapolas, seguindo os consellos que che indique o profesional. Despois da perforación, non debes bañarte na piscina nin no mar ata que teña cicatrizado a intervención.

10. Despois da colocación do piercing pide factura polo pagamento do servicio, é importante para unha posible reclamación. Controla a zona ónde está colocado o piercing e acude axiña ó médico ante estes síntomas: febre, arroxamento e/ou inflamación, dor ou molestias.